Lautén, 05 Outubru 2021 – Ministru Agrikultura no Peska (MAP) Pedro dos Reis, ho Vise Ministru Komérsiu no Indústria Domingos Lopes Antunes, hamutuk ho Embaixadór Nova Zelándia iha Timor-Leste, Philip Hewitt, iha tersa (05/10) ne’e, inaugura sentru fini ikan Tilapia dahuluk iha munisípiu Lautén ho modalidade Parseria Públiku Privada (PPP) ne’ebé apoia hosi Governu Nova Zelándia, no implementa hosi Organizasaun Non Governamentál (ONG) WorldFish, ne’ebé sai hanesan parte ida hosi projetu Parseria ba Dezenvolvimentu Akikultura iha Timor-Leste, iha aldeia Ipar-Ira, suku Parlamentu, postu-administrativu Lautén.
Iha serimónia ne’e, Vise Ministru Domingos Lopes agradese ba jenerozidade hosi Governu Nova Zelándia ba apoiu sentru fini ikan ne’ebé mak bele rezolve problema kadeia valór iha setór akikultura nian. Nia agradese mós ba WordWish ne’ebé inisia modalidade PPP atu jere sentru fini ikan hodi garante efisiénsia no sustentabilidade.
Membru Governu ne’e enkoraza inisiativa refere atu kontinua prodúz ikan tilapia hodi responde ba nesesidade merkadu nian no mós bele kontribui ba hadi’a mal-nutrisaun iha rai-laran.
Hafoin ida ne’e, membru Governu na’in rua ne’e ho Embaixadór Nova Zelándia no komitiva halo mós vizita ba fatin Sentru viveiru ikan hodi haree direita oinsá prosesu hakiak ikan nian no sentru nia jestaun.
Fonte: Mídia Ministério do Turismo, Comércio e Indústria (MTCI)