Dili, 15 Novembru 2021 - Ministru Interiór (MI) Taur Matan Ruak akompaña hosi Vise MI, Antonio Armindo no mós Ministru Prezidénsia Konsellu Ministru, Fidelis Manuel Leite Magalhães, iha segunda (15/11) ne’e, hahú diskute kona-ba papél MI nian hodi luta kontra tráfiku umanu iha Timor-Leste, ne’ebé servisu hamutuk ho Organizasaun Nasoens Unidas (ONU) liuhosi Organizasaun Internasional Migrasaun (sigla inglés, IOM) no mós parseria hosi Governu Austrália.
“Diskusaun ohin ne’e nia objetivu mak atu haree oinsá komponente no departamentu sira iha Governu nian bele aumenta sira-nia esforsu hodi bele hetan rezultadu ne'ebé máximu aléin hosi ida ne’e mós atu iha aproximasaun ida hanaran ‘whole government’ katak Governu tomak bele halo esforsu ida di'ak liu iha luta kontra tráfiku umanu. Entaun ohin ne’e fokus liu ba iha kanál Ministeriu Interiór nian, ita-nia Primeiru-Ministru mós hanesan Ministru Interiór ho nia Vise,” informa Fidelis Magalhães, hafoin remata enkontru refere iha rezidénsia ofisiál Primeiru-Minitru nian iha Faról, Dili.
Governante ne’e afirma, krime organizadu kontinua movimentu iha eskala nasionál no mós internasionál tanba ne’e presiza atensaun sériu hosi instituisaun Governu hotu-hotu.
“Ita boot sira hatene katak tráfiku umanu ne’e krime globál, krime internasionál ne'ebé mak tenke hetan atensaun no esforsu boot liu hosi nasaun sira hotu iha mundu. Timor-Leste mós rekoñese katak ida ne’e hanesan dezafiu boot ida mai ita-nia rai tanba ne’e ameasa não konvensionál ne'ebé maka sai dezafiu ba nasaun barak. Ne’e mós iha ligasaun ho krime organizadu no mós atan ka eskravidaun Governu nian,” Fidelis subliña.
Fonte: Mídia Serviço Relações Públicas de Ministério do Interior