JICA FÓ APOIU TRANSPORTE BA MINISTÉRIU SAÚDE TIMOR-LESTE
Dili, 13 Dezembru 2021 – Ministra Saúde Odete Maria Freitas Belo simu tan apoiu ekipamentu Transporte hosi Governu Japaun liuhosi Japan International Cooperation Agency (JICA) JICA iha Timor-Leste hodi tulun servisu Ministériu Saúde nian.
Transporte hirak ne'e entrega hosi Diretór Kuartél Jerál Pasifiku no Sudeste Aziátiku Divizaun 6 JICA, Tamio Shinya, no hala’o, ohin (13/12), iha resintu Madre FMA Komoro, Díli.
Ministra Saúde hatete, transporte ne’ebé JICA apoia ba Ministériu Saúde ne’e la’os atu haree de’it ba iha Serbísu Autónomo Médikamentu no Ekipamentu Saúde (SAMES) maibé sei aloka ba munisípiu atu halo distrubuisaun ai-moruk ba sentru saúde no postu saúde sira iha área rurál.
“Termu entrega transporte ba distribuisaun ai-moruk no transporte sira ne’e la’os haree de’it ona ba SAMES maibé ita mós aloka truckbox ne’ebé mak ita sei oferese ba munisípiu sira. Tanba ohin ne’e munisípiu ida sei iha truckbox ne’e ida atu bele ajuda lori ai-moruk wainhira SAMES distribui bá iha munisípiu, sira distribui tutan bá iha sentru saúde sira ou postu saúde, depende ba sira nia jestaun halo oinsá atu lori ai-moruk sira ne’e ba fatin ne’ebé mak rurál tebetebes no transporte ida-ne’e mak sei ajuda sira,’’ dehan Ministra Saúde.
Fonte: Mídia Palácio das Cinzas
