Likisa, 02 Outubru 2023 - Governu liuhosi Vise Primeiru Ministru Ministru Koordenadór ba Asuntu Ekonómiku Ministru Turizmu no Ambiente, Francisco Kalbuadi Lay, hamutuk ho Ministru Komérsiu no Industria, Nino Pereira, lansa intervensaun ba foos hamutuk tonelada 2.300 ne’ebé kada saku ho kilograma 25 sei fa’an ba merkadu sira iha territóriu nasionál ho folin $12, hodi salva povu hosi krize folin foos ne'ebé mak durante ne'e sa'e maka'as hosi $18 kada saku 25Kg no iha munísipiu sira ho folin liu $20. Serimónia lansamentu refere hala’o iha armazein Sentru Lojístika Nasionál (CLN, sigla portugés) iha Segunda (02/10) iha Tibar, Likisa.

Governu lansa  intervensaun ba presu foos refere bazeia ba Dekretu-Lei (DL) ne’ebé mak Konsellu Ministru aprova tiha ona, kona-ba governu atribui subsídiu ba importadór foos hodi normaliza presu foos iha rai laran, no DL ne'e promulga tiha ona hosi Prezidente Repúblika. Programa intervensaun ida-ne’e sei hetan monitorizasaun hosi Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA), diresaun nasionál regulasaun komersiál no protesaun konsumidór, inklui autoridade lokál sira. Tuir planu sei hahú uluk iha Díli hafoin kontinua ba munisípiu sira seluk no fa’an direta hosi CLN.