Manatutu, 20 Setembru 2021 – Governu liuhosi Ministériu Agrikultura no Peska (MAP) nia Diresaun Nasionál Estensaun Agríkola (DNEA), Departamentu Dezenvolvimentu Programa no Metodolojia Estensaun Agríkola, halo lansamentu ba programa Eskola Kampu Agrikultór kona-ba kuda hare tuir sistema Prátika Agrikultura Di’ak (PAD) uza Adubu Orgániku Naza, iha segunda (20/9) ne’e iha irigasaun Blutu, suku Hatu-Ralan, postu-administrativu Laleia, munisípiu Manatutu.
Iha atividade refere, Tékniku implementadór Vasco Simões esplika katak, program eskola ne’e ho objetivu prinsipál mak atu hasa’e koñesimentu ka skill no badaen agrikultór sira nian liuliu sira ne’ebé halo natar.
“Atu hadi’a agrikultór sira-nia rekursu lokál ne’ebé sira iha ho di’ak, ekipamentu no materiál ne’ebé uza iha sistema PAD mak hanesan, hand tractor hodi fila rai no ita atu kuda hare oan uza caplak, iha manutensaun nian ita uza hand player hodi rega uza adubus orgániku,” Vasco esplika.
Iha fatin hanesan, Administradór Laleia Cosme Ximenes hato’o nia agradesimentu ba MAP relasiona ho atividade ne’e, tanba bele hanorin ona estratejia no mekanizmu sira ne’e ba agíkultor sira hodi kuda hare ne’ebé mak di’ak no loloos.
Koordenadór Estensionista António de Sousa Correia mós rekomenda katak MAP tenke realiza programa Eskola Kampu Agrikultór ne’e iha fatin seluk tán tanba grupu barak mak seidauk hetan informasaun kona-ba buat ne’ebé sira hanorin.
Fonte: Mídia Ministério da Agricultura e Pescas (MAP)