Dili, 07 Outubru 2022 - Governu liuhosi Vise Primeiru Ministru no Ministru Planu Ordenamentu (VPM no PMO), José Maria dos Reis ne’ebé reprezenta Primeiru Ministru, Taur Matan Ruak, halo lansamentu ba projetu konservasaun udan-been no rai hodi minimiza rísku inundasaun iha kapitál Dili ne’ebé realiza iha Metiaut, postu administrativu Kristu Rei, munispíu Dili.

Iha lansamentu ne’e, Vise Primeiru Ministru hateten katak wainhira ita la halo jestaun di’ak ba bee, rai, no ahi, mak sira sei fó dezastre mai ita.

“Ohin ha’u haksolok tebes bele marka prezensa iha ne’e [...] halo lansamentu ba konservasaun no mitigasaun ba iha inundasaun iha sidade Dili ne’ebé mak ita halo iha Metiaut ida-ne'e. Hanesan ohin hatete katak bee, rai no mós komponente ida tan ne’ebé importante tebes mak ahi, komponente tolu ne’e fó vida ba ita ema, rai, bee no ahi. See ita ema la halo jestaun di’ak ba iha komponente tolu ne’e fó dezgrasa ka fó dezastre ba ita rasik, tanba ida-ne’e maluk sira hotu ohin ita hamutuk iha ne’e atu halo lansamentu ba konservasaun bee ne’ebé mak Ministériu Obras Públikas hahú ona iha fatin balun hamutuk ho Sekretáriu Estadu Ambiente, no mós servisu hamutuk ho ONG sira ne’ebé fó atensaun liu ba oinsá halo konservasaun bee. Ita hotu hatene, bee-matan importante tebes para ita halo konservasaun no ita hotu hatene katak bee bainhira ita halo jestaun ho di’ak nia fó benefísiu mai ita maibé bainhira ita halo jestaun ladi’ak fó fila-fali dezastre boot ba ita. [...] tinan rua tutuir malu iha 2020 no 2021 iha 13 de Marsu no 4 de Abril [...] dezastre ida-ne’e fó impaktu boot tebes ba iha vida populasaun ninian, lakon sasán barak, lakon hela fatin, no afeita mós ba infraestrutura balun, ida-ne’e lisaun boot ida katak oinsá mak ita bele halo jestaun ne’ebé di’ak, ho frazilidade ne’ebé mak ita iha, ita bele supera ba iha situasaun sira hanesan ne’e [...]" 

Iha oportunidade ne’e Vise Primeiru Ministru nu’udar mós Ministru ba Planu no Ordenamentu informa mós kona-ba daudauk ne’e MPO hahú hela estudu ba iha planu urbanu Dili nian, tanba ne’e servisu hamutuk ho instituisaun seluk ne’e importante tebes atu transforma Dili sai sidade ne’ebé sustentável.

Eventu ne’e akompaña hosi Ministru Obras Públikas (MOP), Abel Pires da Silva, Sekretáriu Estadu Ambiente, Demétrio do Amaral de Carvalho, hamutuk ho dirijente sira iha institutu autónomu no tutela, inklui Diretór Organizasaun Naun Governamentál no autoridade lokál sira.