Dili, 20 Outubru 2021 – Konsellu Ministru hala’o sorumutuk ohin (20/10) iha Palásiu Governu, Dili, no deside hodi propoin ba Prezidente Repúblika (PR) Francisco Guterres Lú Olo atu promulga renovasaun Estadu Emerjénsia (EE) ba dala-19 ba loron tolunulu (30) tán, ne’ebé sei vigora hahú hosi 30 Outubru no remata iha 28 Novembru 2021.
Desizaun ne’e Konsellu Ministru deside hafoin rona tiha aprezentasaun hosi parte Sala Situasaun Sentru Integradu Jestaun Krize (SIJK) iha sorumutuk refere, kona-ba pontu situasaun epidemiolójika iha Timor-Leste.
“Ho hanoin katak kauza determinante sira ne’ebé justifika ona deklarasaun Estadu Emerjénsia no ninia renovasaun sira kontinua mantéin, no atu bele evita no neutraliza risku propagasaun sira hosi variante foun SARS-CoV-2, no nune’e bele proteje saúde públika no kapasidade resposta hosi Sistema Nasionál Saúde nian, Governu propoin ba Señór Prezidente Repúblika katak, ho renovasaun Estadu Emerjénsia nian, permite suspensaun ka restrisaun ba direitu no garantia fundamentál balu,” Governu esplika iha nia komunikadu imprensa ofisiál ne’ebé Timor News asesu ohin.
Enkuantu EE ba dala-18 Governu aplika hahú hosi 30 Setembru 2021 no sei remata iha 29 Outubru 2021.
Fonte: Mídia Ministério Presidénsia do Conselho Ministro