Dili, 29 Novembru 2021 – Vise Ministru Interiór (MI), António Armindo, iha segunda (29/11) ne’e, hateten katak, Governu deside ona hodi loke fronteira terestre entre Indonézia no Timor-Leste loron 2 kada semana, no la presiza ona karta autorizasaun hosi Sentru Integradu Jestaun Krize (sigla portugés CIGC).
“Uluk ema atu tama mai teritóriu nasionál tenke hetan autorizasaun hosi CIGC, maibé hosi ohin ba oin ita aplika prosesu normál lei Migrasaun nian maibé nafatin loke ba loron rua de’it kada semana. Mezmu laiha ona Estadu Emerjénsia maibé nafatin haree dezenvolvimentu situasaun iha fronteira ho didi'ak tanba moras Covid-19 ne’e seidauk hotu no posibilidade bele mai ho variante foun iha kualkér tempu. Entaun estratéjia ne'ebé Ministériu Interiór haree katak presiza nafatin prevensaun iha fronteira hodi diminui risku moras Covid-19 variante foun mai Timor-Leste,” António Armindo informa ba jornalista sira iha nia knaar fatin Ministériu Interiór, Vila-Verde, Dili.
Governante ne’e realsa, bazeia ba dekretu lei Nu. 26/2021 iha artigu 18 ne'ebé publika iha jornál repúblika iha loron 26 Novembru 2021, kona-ba funsionamentu postu fronteira terestre Mota-Ain, Salele no Sakato sei loke de'it iha loron segunda-feira tuku 9 dadeer to’o tuku 3 loro-kraik, bele sai hosi teritóriu nasionál ba ema no sasán merkadoria. Enkuantu iha loron kuarta entre tuku 9 dadeer to’o tuku 3 loro-kraik autoriza ema no sasán merkadoria hosi nasaun seluk bele tama teritóriu nasionál.
Fonte: Mídia Serviço Relações Públicas de Ministério do Interior