Dili, 23 Jullu 2021 – Governu sei loke estrada korta hodi liga suku Metiaut ho Kamea tuir orientasaun ne’ebé Primeiru-Ministru Taur Matan Ruak fó ba Ministru Obras Públika (MOP) Salvador Pires no Prezidente Institutu Jestaun Ekipamentu (IJE) Hermenegilda Laurentina, iha sexta (23/7) ne’e, wainhira sira observa direita terenu ba koneksaun estrada hosi suku Metiaut ba to’o iha área foho-leten Kamea nian.
“Estrada ida-ne’e uluk SEFOPE mak loke maibé falta kilómetru 1 liu, ha’u-nia hanoin ne’e imi loke liga tiha (halo koneksaun estrada hosi Metiaut to’o Kamea iha foho leten),” dehan Primeiru-Ministru ba MOP no Prezidente IJE iha terenu observasaun.
Hatán ba ida ne’e, MOP hateten katak, iha posibilidade atu halo abertura foun nune’e bele halo koneksaun ba estrada ne’ebé eziste ona iha Kamea, nune’e ligasaun Kamea ho Metiaut bele iha dala korta.
“Ohin Sr. Primeiru-Ministru konvida ha’u ho Sra. Prezidente IJE mai haree hela dalan ligasaun Metiaut ba Kamea ne’ebé uluk Governu anteriór loke balu ona, no iha posibilidade para atu halo abertura foun atu nune’e bele halo koneksaun ba estrada ne’ebé eziste ona iha Kamea, nune’e ligasaun Kamea ho Metiaut bele iha dalan korta (dalan liuhosi foho leten hosi Metiaut to’o Kamea nian). Ida-ne’e mak ohin ita lori ho Sra. Prezidente ho nia ekipa no mós Diresaun Nasionál Estrada, Sr. Diretór ho nia ekipa, xefe departamentu no tékniku sira atu haree posibilidade, orsida sira sei koordena ho na’i Liurai atu identifika pontu abertura ne’e hosi ne’ebé,” dehan MOP.
Prezidente IJE mós hateten katak ekipa sei halo uluk survey hodi identifika dadus sira ne’ebé presiza molok hakat ba faze konstrusaun.
Fonte: Mídia Ministério das Obras Públicas (MOP)