Ainaru, 06 Outubru 2023 - Ministru Interiór (MI), Francisco da Costa Guterres, kompromete katak governu dasia liuhosi ministériu interiór sei halo rekrutamentu ba membru Polísia Nasionál Timor-Leste (PNTL) foun hamutuk na'in-450 iha tinan 2024 hodi koloka ba iha munisípiu sira inklui unidade sira ne'ebé mak sei menus númeru pesoál PNTL.

“Haree ba rekursu ne’ebe limitadu ita halo tiha ona enkontru iha kosellu ministru ita-nia primeiru ministru fó sai klaru tiha ona katak tinan oin sei rekruta tan membru polísia hamutuk na'in-450. Orsamentu ba iha rekrutamentu ita tenke tau ketak tanba ne’e maka iha ne’e ita rekruta buat rua, rekrutamentu ba ajente no ofisiais. Ha'u sei ko'alia ho komandante jerál ita halo uluk parte interna ninian depois mak loke ba públiku”, hateten MI Francisco bainhira hamutuk ho Komandante Jerál PNTL, Komisáriu Henrique da Costa, iha Sesta (06/10) ne'e hala’o vizita hodi observa direta kondisaun PNTL munisípiu Ainaru nian.

Iha fatin hanesan Komisáriu Henrique da Costa, hateten katak nia komunika tiha ona ho MI kona ba rekrutamentu refere hodi hein katak planu ne'e bele realiza iha tinan 2024, nune'e bele aumenta membru PNTL  hodi reforsa liután seguransa iha rai laran.