Dili, 08 Setembru 2021 – Governu iha ona planu polítika atu transforma Portu Dili sai pontu Turizmu no Komersiál no Portu Baía Tibar mak sei troka hikas Portu Dili. Planu ida ne'e sei la'o tuir dezeñu konseituál hanesan imajen iha leten, no ho objetivu atu halo sidade Dili sai furak liutan, atrai turista inklui fo oportunidade empregu no komersiu ba rezidente sira iha Dili.
“Wainhira (Portu Baía Tibar) remata no hahú halo operasaun, Portu Baía Tibar sei troka Portu Dili hodi fasilita movimentu importasaun no esportasaun sasán. [...] Projetu (Re-dezenvolvimentu no komersializasaun Portu Dili) ne’e sei kria empregu no fronese oportunidade komersiál ba rezidente sira iha Dili, halo kapitál Timor-Leste sai furak liután hodi bele atrai turista doméstiku no turista internasionál iha futuru,” Governu informa liuhosi Ministériu Finansa nia komunikadu imprensa.
Projetu Re-dezenvolvimentu no Komersializasaun Portu Dili ne’e hetan ona aprovasaun hosi Konsellu Ministru iha 28 Jullu 2021. Nune’e, ohin (08/9), Konsellu Ministru analiza hikas projetu refere no hamosu alterasaun balu iha faze redasaun finál, tanba ne’e, presiza re-submete ba deliberasaun foun hosi Konsellu Ministru.
“Ida ne’e projetu nasionál importante, lokalizadu iha área estratéjika sentrál no importante iha sidade Dili, nini funsaun iha ligasaun marítima ba populasaun sira hosi Oekusi no Ataúru, no potensiál atu sai polu dinamizadór turizmu marítima iha Timor-Leste,” Governu esplika iha komunikadu imprensa refere.
Projetu Re-dezenvolvimentu no Komersializasaun Portu Dili ne’e ho modalidade Parseria Públiku-Privada ho kustu estimativu millaun %50 resin, atu transforma sai hanesan pontu turizmu ne’ebé sei inklui fasilidade kulturál, rekreativu no rezidensiál.
Fonte: Ministério das Finanças (MF)