Dili, 15 Maiu 2021 – Komunidade iha aldeia Renbor, suku Aiteas, postu-administrativu Manatutu-vila, munisípiu Manatutu, la asesu ba enerjia eletrisidade besik fulan rua ona afeita hosi inundasaun ne’ebé akontese iha 04 Abríl liubá hodi estraga tiha liña eletrisidade ne'ebé to’o agora seidauk hetan manutensaun hosi parte Governu.

“Seidauk lakan, to’o agora la lakan. Inundasaun bee-boot, riin eletrisidade bee lori hotu tanba ne’e agora daudauk aldeia Renbor labele asesu ba eletrisidade, la lakan fulan besik rua ona,” dehan Marcos Pereira nu’udar komunidade ida hosi Renbor ba jornalista Timor News ohin (15/5) via telefónika.

Marcos dehan katak autoridade lokál sira haree ona maibé hosi parte Ministériu Obras Públika (MOP) seidauk foti asaun ruma hodi hadi’a, enkuantu problema eletrisidade ne’e difikulta tebes estudante sira atu partisipa iha aula online no komunidade sira-nia sasán eletrónika hanesan jeleira balu hahú aat ona.

Tanba ne’e Marcos husu ba parte MOP hodi bele rezolve iha tempu badak nia laran atu bele fasilita komunidade no estudante iha aldeia refere ne’ebé hein hela enerjia eletrisidade.