Dili, 22 Jullu 2021 – Porta-vóz VIII Governu Fidelis Leite Magalhães lori Primeiru-Ministru Taur Matan Ruak no Governu Timor-Leste nia naran hato’o solidariedade ba vítima hosi inundasaun ne’ebé akontese iha loron hirak ikus ne’e hahú hosi 20 Jullu, iha rejiaun balu iha Xina parte sentrál.
“Governu Timor-Leste hato’o ninia sentidu kondolénsia ba Governu no Povu Repúblika Populár Xina nian, hafoin estragus boot no lakon vida nian kauza hosi udan boot iha loron hirak ikus ne’e iha rejiaun sentru Xina nian, ne’ebé tuir autoridade meteorolójika sira país nian, hateten katak ne’e mak udan boot forte liu iha tinan rihun ikus nian. [...] hodi Primeiru-Ministru, Taur Matan Ruak no Governu tomak nia naran, hato’o solidariedade ba Governu no povu Repúblika Popular Xina nian,” temi iha komunikadu imprensa ofisiál ne’ebé divulga ohin (22/7).
Pelumenus ema na’in-25 mak mate no na’in-7 mak lakon iha kapitál provínsia Zhengzhou, situada besik kilómetru 700 ba sudoeste Pekín nian. Iha estimativa katak besik ema millaun ida mak afeta hosi efeitu bee-sa’e no besik ema 200.000 mak evakua ona ba abrigu sira, haktuir iha komunikadu imprensa.
Udan boot ne’ebé halo bee sa’e sistema metru sidade nian, estraga estrada, veíkulu, uma no iha ospitál sira mak nakonu ho bee no laiha eletrisidade.
Fonte: Mídia Gabinete do Primeiro-Ministro (GPM)