Dili, 07 Jullu 2021 – Grupu deskoñesidu oho nasaun Haiti nia Prezidente Jovenel Moise iha nia uma privadu iha tersa (06/7) kalan, haktuir nytimes ohin (07/7).
Jovenel Moise nia mate ne’e deklara direita hosi Primeiru-Ministru Haiti, Claude Joseph, liuhosi komunikadu imprensa iha kuarta (07/7) dadeer oras Haiti.
Nytimes haktuir katak iha komunikadu ne’e Joseph hateten Prezidente Jovenel Moise mate tanba hetan tiru hosi grupu deskoñesidu ne’ebé halo atake ba nia uma privadu.
Primeiru-Ministru Joseph la identifika klaru liu kona-ba autór kriminozu sira. Maibé, nia dehan katak grupu ne’e ko’alia lian Española.
Iha atake ne’e Moise nia feen Martine Marie Etienne konsege hetan salvasaun maske iha kanek balu kauza hosi tiru, no oras ne’e parte kompetente halo hela investigasaun ba insidente refere.
Haiti nu’udar nasaun ida iha kontinente Amérika Norte ne’ebé hamriik ho sistema semi-prezidensiál hanesan Timor-Leste.
Fonte: NyTimes