Ainaru, 16 Marsu 2022 – Xefe Grupu Haburas Suku Foho Ailiku, Juvinal da Costa, informa ba Timor News katak udan boot ne’ebé akontese durante loron tolu iha semana kotuk entre loron 11 to’o 13 Marsu ne’e estraga tiha sira-nia batar éktare ida ho balu ne’ebé seidauk kolleta tanba sei nurak hela.

“Udan boot loron tolu iha dia 11 to’o 13 liubá ami nia grupu Haburas Suku Foho Ailiku ne'e ami nia batar hamutuk éktare 12  maibé éktare ida ho balu mak hetan estragus, no ami nia fatin refere agora daudauk hetan ameasa boot hosi mota. […] La konsege kolleta tanba agora daudauk batar sei nurak hela. Nu'udar ema to’os-na’in sente triste tebes ho akontesimentu sira ne’e,” xefe grupu produtivu ne’e informa ba jornalista Timor News ohin (16/3) via telefone.

La’os batar de’it, maibé nia akresenta katak udan boot ne’e estraga mós ai-hán ne’ebé sira kuda hodi fó-hán karau ne’ebé sira-nia grupu hakiak.

Tanba ne’e nia reprezenta grupu refere no komunidade tomak, husu ba ministériu relevante atu bele tau atensaun no bele kria barajen hodi asegura sira-nia fatin.

"Nu’udar povu agrikultór halerik ne’ebé ami iha hakarak hato’o duni ba na’i-ulun sira katak, sira mak ami nia aman para ida ne’e katak setór agríkola ne'e iha parte ruma importante tebes nune’e ministériu relevante bele tau atensaun netik ba ami oinsá atu kria barajen hodi asegura ami nia fatin," Juvinal husu.

Grupu Haburas Suku Foho Ailiku nu'udar grupu ida iha Suku Foho Ailiku, postu-administrativu Hatu-hudo, munisípiu Ainaru.