Dili, 01 Outubru – Governu liuhosi Ministériu Finansa (MF) nia Gabinete relata iha divulgasaun ofisiál ida katak projetu instalasaun kabu submariñu fibra ótika (inglés, fiber optic) ne’ebé liga mai Dili hosi Darwin, Austrália, ninia dezeñu enjeñaria iha ona faze finál no Komisaun Nasionál Aprovizionamentu inisia ona konkursu no hahú simu submisaun proposta tékniku no finanseiru to’o iha 11 Outubru 2021.
Governu esplika iha divulgasaun refere katak projetu instalasaun fibra ótika ne’e sei halo servisu rede telefone no internet lalais no baratu liu iha Timor-Leste.
“Projetu ne’e sei permite servisu interligasaun rede telefone no internet ne’ebé lailais liu, baratu liu no seguru liu,” haktuir Gabinete MF nia informasaun divulga ohin (01/10).
Enkuantu finansiamentu ba projetu refere mai hosi Fundu Infraestrutura ho kustu estimativu millaun $42.
Fonte: Ministério das Finanças (MF)