Dili, 23 Novembru 2021 – Kordenadór Jestór Merkadu Manleuana Julio Barros Caldas informa kata, hariis-fatin públiku iha merkadu Manleuana kondisaun la di’ak, odamatan aat, fo’er, fasilidade iha laran estragus, no fó impaktu negativu ba saúde.
“Hariis fatin odamatan laiha nia kondisaun ladi’ak tanba luan hela, balu aat duni, balu nia fatin atu soe bee nene monu hotu, aat no dodok hotu,” Julio informa ba jornalista Timor News, ohin (23/11) iha nia knaar-fatin, Manleuana, Dili.
Nia akresenta, sira levanta ona ba parte relevante hanesan Autoridade Munisipiu Dili no liuliu Governu maibé to’o ohin loron seidauk iha resposta.
“Pedidu ami hato’o ona ba Governu maibé até agora seidauk responde, liuliu ba hariis-fatin,” Julio esklarese.
Julio afirma, ho kondisaun hariis-fatin públiku aat hotu hanesan ne’e, negosiante no kompradores sira barak mak husu ajudu ba jestór merkadu atu uza hariis-fatin iha edifísiu merkadu Manleuana nian tanba nesesidade obriga.
Aléin hosi ne’e, Júlio mós hato’o problema seluk tán mak fatin soe fo’er ka lixeiru ne’ebé la sufisiente iha merkadu Manleuana. Tanba ne’e, nia husu parte Governu atu haree hadi’a problema hirak ne’e.
Fonte: Timor News