HASA’E TAXA BA TABAKU IMPORTANTE TEBES HODI PREVENE MINORIDADE ATU FUMA
Dili, 04 Agostu 2021 – Diretór Aliansa Nasionál Kontrolu Tabaku Timor-Leste (sigla portugés, ANCT-TL) Sancho Fernandes hateten katak hasa’e taxa ba tabaku importante tebes atu labele fó oportunidade ba minoridade sira hodi konsumu tabaku.
“Labele fó oportunidade ba minoridade sira atu konsumu tabaku. Ida ne’e mós sei kombate moras la hada’et sira ne’ebé kauza hosi fuma,” Diretór ANCT-TL akresenta wainhira hato’o nia pensamentu iha semináriu ida ne’ebé realiza iha kuarta (04/8) ne’e iha Otél JL Vila, Dili, no organiza hosi ANCT-TL rasik hamutuk ho organizasaun rua seluk tán.
Iha fatin hanesan, Diretór Jerál Autoridade Aduaneira José Abilio nu’udar Oradór ida iha semináriu ne’e hateten, la’os de’it fumadór sira mak sei hetan moras la hada’et, maibé ema ne’ebé horon sigaru suar mós bele afetadu.
“Aléin hosi ne’e, iha parte ida, hasa’e taxa tabaku kontribui mós ba Orsamentu Jerál Estadu,” nia dehan tán.
Fonte: AIFAESA, I.P
