Dili, 27 Outubru 2021 – Organizasaun Non-Governamentál (ONG) Haktanek Direitu Sidadaun (HDS), iha kuarta (27/10) ne’e, fó formasaun ba prizioneiru ka populasaun prizionál Bekora kona-ba ‘Kontrola Hirus’, ne’ebé realiza iha Prizaun Bekora, Dili, ho objetivu atu prizioneiru sira bele komprende liután oinsá kontrola emosaun hodi evita violénsia.

Iha okaziaun ne’e, Diretór HDS Leão dos Santos husu ba prizioneiru sira atu aproveita didi’ak formasaun ne’e hodi halo mudansa ba hahalok atu nune’e bele evita asaun violentu sira.

Enkuantu Diretór Prizaun Bekora João Domingos iha entrevista hateten katak, formasaun refere importante tebes ba prizioneiru sira tanba wainhira ema la konsege trava ninia emosaun entaun sei hamosu violénsia.

“Ita la konsege trava ita-nia emosaun, ita la konsege kontrola ita-nia emosaun mak hamosu violénsia, kuandu mosu ona violénsia konserteza ita konfronta ona ho lei, lori ba tribunál ita mai iha prizaun. Entaun antes hatene ida ne’e fila-fali ba komunidade tenke kontrola ita-nia an, ne’e mai hosi rezultadu formasaun ida ne’e,” Diretór João esplika ba jornalista Timor News.

Formasaun refere sei realiza durante loron rua ba prizioneiru na’in-60, nune’e, loron dahuluk sei partisipa hosi prizioneiru na’in-30 no loron daruak sei partisipa tán hosi na’in-30.