Dili, 13 Dezembru 2021 – Xefe Departamentu Emerjénsia Ospitál Nasionál Guido Valadares (sigla portugés, HNGV) Vidal de Jesus Lopes informa katak parte HNGV rejista kazu moras denge barak iha tempu udan.

“Hosi emerjénsia HNGV, loos duni rejista kazu moras dengue maka’as liuliu ba labarik sira ne’ebé durante ne’e mai halo tratamentu iha emerjénsia, relasiona ho tempu udan ne’ebé mak ita hasoru. Komunidade tenke iha konsiénsia, Ministériu Saúde no parte relevante sira ho promosaun hodi promove nafatin ambiente ne’ebé saudável ba komunidade hotu-hotu hodi evita susuk ne’ebé durante ne’e prodúz moras denge mak Aedes aegypti atu tata labarik ka ema boot sira,” Vidal de Jesus informa ba jornalista Timor News, ohin (13/12) iha HNGV, Dili.

Nia dehan katak moras denge mós hamate ona ema barak inklui ema na’in-3 ne’ebé mate iha emerjénsia HNGV.

Nia apela ba ema hotu-hotu atu labele husik bee nalihun iha uma hún, jardín no lata nia laran sira, tenke hakoi tiha lata mamuk sira, hodi evita susuk labele moris hosi bee fo’er sira ne’e.