Dili, 30 Abril 2021: Porta-vóz Komandu Polísia Nasionál Timor-Leste (PNTL) Superintendente Xefe Arnaldo de Araújo informa ohin (30/4) iha Kaikoli, Dili, katak, hosi loron 23 to’o 29 Abril 2021 PNTL rejista kazu insidente hamutuk 51 no asidente tráfegu kamaan 14 iha Timor-Leste.
Kona-ba insidente hirak ne’ebé akontese, Arnaldo esplika katak kompostu hosi violénsia doméstika 13, baku malu 10, asaltu 23, ema tama ilegál hosi fronteira 1, estranjeira ida mate, no kazu tara-an 3.
Kazu tara-an ne’e kompostu hosi feto na’in-2 iha munisípiu Baukau, vítima naran Livia Belo Freitas ho idade 26 tara-an iha postu-administrativu Kelikai, vítima ida seluk naran Julieta Ximenes idade 23 tara-an iha Baguia, no vítima ida seluk iha Railaku, Ermera, naran Graciano Soares ho idade 26.
Enkuantu estrajeiru ida ne’ebé mate ne’e ema indianu ida ho naran Ahmid Jamil, mate iha Baukau iha 24 Abril 2021, no PNTL halo hela prosesu investigasaun ba mate-isin ne’e.
Fonte: Mídia Polícia Nacional de Timor-Leste (PNTL)