Manufahi, 27 Setembru 2021 – Prezidente Komisaun Reguladora Arte Marsiál (KRAM) Adriano Corte-Real informa katak idozu na’in-10 mate iha suku Holaru, postu-administrativu Same, munisípiu Manufahi, iha fulan Setembru 2021 nia laran, no sira hatudu sintoma isin-manas no dada iis araska.
Nia informa asuntu ida ne’e ohin (27/9) wainhira partisipa iha enkontru koordenasaun ho autoridade munisípiu Manufahi, kona-ba aprezentasaun mikro planu ba kampaña nasion’al vasinasaun Covid-19, iha Administrasaun Manufahi.
Adriano hateten katak, hanesan veteranu nia prontu koopera hodi mobiliza komunidade sira ba hetan vasina kontra Covid-19, tanba iha suku Holarua ferik-katuas terseira idade na’in-10 resin mak mate iha Setembru nia laran, hatudu sintoma hanesan isin-manas, dada iis araska, no maioria la hetan vasinasaun. Situasaun ne’e mosu tanba ferik-katuas sira atu ba simu vasina maibé ema balu empede.
Administradór Manufahi Arantes Isaac Sarmento relata katak, komunidade sira ne’ebé daudauk ne’e mate iha área munisípiu Manufahi, seidauk hatene loloos tanba saida, maibé kuandu haree didi’ak hatudu sintoma hanesan isin-manas no dada-iis araska, nune’e, komisaun task-force halo ona esforsu hodi lori ekipa saúde direitamente ba suku atu halo vasinasaun ba komunidade sira.
Iha fatin hanesan, Diretór Nasionál Saúde Públiku, Carlitos Correia Freitas, ne’ebé reprezenta Ministra Saúde hateten, maske númeru kazu positivu iha Timor-Leste hahú tún, maibé tenke kuidadu-an nafatin tanba munisípiu barak relata ba Ministériu Saúde katak, komunidade terseira idade sira mate nab-naban.
Nia akresenta, Foin lalais ne’e ekipa Ministériu Saúde halo ona audit ba komunidade na’in-50 resin mate iha postu-administrativu Kelikai, munisípiu Baukau, no iha tempu badak ekipa ne’e sei desloka ba munisípiu Manatutu no Kovalima, tanba sidadaun barak mak mate maske la hatudu sintoma ne’ebé klaru, maibé barak hatudu sintoma isin-manas, dada iis araska, presiza duni halo investigasaun inklui iha munisípiu sira seluk.
Fonte: Diáriu "Roman ba Sosiedade" Manufahi