Dili, 13 Agostu 2021 – Arsebispu Arkidioseze Metropolitana Dili, Dom Virgílio do Carmo da Silva, hasoru malu ho Primeiru-Ministru Taur Matan Ruak, ohin (13/8) iha Faról, Dili, hodi diskute kona-ba Igreja Katólika nia inisiativa atu harii Universidade Katólika iha Timor-Leste ne’ebé to’o oras ne’e sei hein hela lisensa ka legalizasaun hosi Ministériu Ensinu Superiór, Siénsia no Kultura (MESSK).
Inisiativa refere, Dom Virgílio hateten katak, oras ne’e iha hela faze preparatóriu dokumentu iha MESSK, tanba ne’e, Universidade Katólika sei hahú hamriik wainhira hetan ona lisensa.
“Ohin Kuaze semana rua ba kotuk Arkidioseze Dili, ami komesa aprezenta ami-nia dokumentu ba kriasaun Universidade Katólika Timor-Leste no tanba lia-anin ne’e, ema komesa konta ami-nia responsabilidade, partilla ida ne’e ho Exelénsia Primeiru-Ministru maske lisensa sei hein iha Ministériu Ensinu Superiór, Siénsia no Kultura (MESSK) sei estuda hela,” dehan Dom Virgílio hafoin remata enkontru ho Primeiru-Ministru
Dom Virgílio mós hateten katak ideia atu harii Universidade Katólika ne’e hahú kedas iha tinan 20 ba kotuk.
Enkuantu Primeiru-Ministru hato’o nia apresiasaun ba Igreja Katólika nia inisiativa ida ne’e tanba sei tulun Governu iha elevasaun kualidade ensinu superiór iha Timor-Leste.
Fonte: Mídia Gabinete do Primeiro-Ministro (GPM)