Dili, 21 Maiu 2021 – Graduandu hamutuk na’in-251 hosi Universidade Nasionál Timor Lorosa’e (UNTL) mak sei partisipa iha serimónia graduasaun online ka virtuál ne’ebé UNTL sei realiza iha 25 Maiu 2021 via aplikasaun Zoom.
“Ita deside graduasaun online ba iha 25 Maiu 2021 komesa tuku 9:55 dadeer to’o remata, ita sei halo ensaiu kona-ba distansiamentu ba estrutura sira ne’ebé sei partisipa direita, no graduandu sira liuhosi aplikasaun ne’ebé uza ba serimónia solene ne’e,” dehan Vise Reitór ba Asuntu Akadémiku no Garantia Kualidade (VRAAGK) Samuel Venâncio de Sousa Freitas iha sexta (21/5) ne’e iha Kampus Sentrál UNTL, Dili.
Tanba ne’e, VRAAGK ne’e husu ba graduandu sira atu hatais toga kompletu ne’ebé sira foti ona iha parte Diresaun Nasionál Atendimentu Estudante (DNAE) hamutuk ho família hodi partisipa liuhosi aplikasaun Zoom.
Enkuantu graduandu na’in-251 ne’e kompostu hosi fakuldade lima (5) mak hanesan fakuldade Enjeñaria, Siénsia no Teknolojia na’in-34, fakuldade Edukasaun, Arte no Umanidade na’in-71, fakuldade Medisina no Siénsia Saúde na’in-94, fakuldade Ekonomia no Jestaun na’in-17 no fakuldade Siénsia Sosiál na’in-35.
Graduandu hosi fakuldade Filozofia no Siénsia Umana no fakuldade Agrikultura sei partisipa iha graduasaun prezensiál wainhira Serka Sanitária remata ona.
Fonte: Mídia Universidade Nacional Timor Lorosa'e (UNTL)