Dili, 04 Novembru 2002 - Governu konstitusionál daualu halo aprezentasaun reajustamentu planu estratéjiku dezenvolvimentu (PED) tinan 2011-2030 no no rezultadu avaliasaun ba ninia implementasaun ne’ebé halo tiha ona, ba partidu polítiku sira ne’ebé hamahon-an iha plataforma entedimentu – FRETILIN, PLP, no Khunto – iha Salaun Nobre, Ministériu Negósiu Estranjeiru no kooperasaun, iha Praia dos Coqueiros.

Objetivu reajustamentu PED ne’e tanba ninia implementasaun liu tiha ona tinan sanulu no avaliasaun hatudu katak PED falta rigor iha ninia implementasaun. Ida ne’e tanba implementasaun hosi metas ne’ebé define ba faze I (2011-2015) no faze II (2015-2020) PED nian atinje deit 26%.

Tuir avaliasaun ne’ebé halo tiha ona, metas hirak ne’e la atinje tanba alokasaun orsamentu limitadu ka la konsistente, rekursu umanu menus, metas balun ambisiozu no kuaze metade hosi metas jerál liu no la iha sasukat, no PED la instrumentaliza ba planu operasionál, monitorizasaun no avaliasaun tanba la iha ierarkia kauza efeitu. 

Prosesu reajustamentu PED lidera hosi Primeiru-Ministru, Taur Matan Ruak, no  planu ne’ebé reajusta tiha ona ne’e sei sai matadalan ba dezenvolvimentu nasionál. Ho nune’e, ekipa téknika halo konsultasaun públika iha nivel oioin, hanesan ho titular no membru órgaun soberania, eis-titular, líder nasionál, akadémiku, konfisaun relijiozu, organizasaun sosiedade sivíl, setór privadu no seluseluk tán, inklui mós grupu komunitáriu hosi munisípiu 13, inklui mós RAEOA.

Ho opiniaun konsensual, iha prosesu konsultasaun públika ampla ba prosesu reajustamentu medida estratéjika sira, líder nasionál no reprezentante povu sira hato’o rekomendasaun sira tuir mai:

(1) Garante estabilidade no kontinuidade implementasaun PED ne’ebé reajusta ona ba futuru, tanba durante ne’e dezafiu boot ida mak deskontinuidade ba prosesu dezenvolvimentu. Presiza lei ida hodi vinkula no garante ninia implementasaun.  (2) Tamba tinan rua-nulu hafoin independénsia, ita la konsege hadi’a sistema edukasaun no saúde, dezenvolvimentu agrikultura no infraestrutura báziku sira, hanesan bee no saneamentu, estrada no ponte sira. Ho nune’e reajustamentu PED ne’e tenke mai hatán ba diretu fundamental ba moris nian, hanesan saúde, edukasaun, asesu ekonómika atu moris ho dignu.