Dili, 16 Setembru 2021 – VIII Governu Timor-Leste informa katak implementasaun projetu uma kbiit-laek hamutuk 1.252 ba faze dahuluk iha tinan ida ne’e en jerál atinje ona pursentu 19 (19%), no espesífikamente iha munisípiu balu atinje pursentu 40 (40%).

“Progresu Konstrusaun Uma Kbiit-Laek ba família kbiit-laek sira iha teritóriu laran kontinua la’o no hatudu progresu, maske hasoru difikuldade iha terenu tanba relasiona ho situasaun pandemia Covid-19, konfinamentu obrigatóriu, serka sanitária, no problema asesu estrada ba benefisiáriu nia fatin, maibé projetu Uma Kbiit-Laek to’o semana daruak fulan Setembru ne’e atinje ona 19% iha teritóriu laran, no iha Munisípiu balu hatudu progresu to’o ona 40%,” esplika iha komunikadu ofisiál ne’ebé Timor News asesu ohin (16/9).

Governu esplika katak uma ba kbiit-laek ne’ebé Governu konstrui ne’e iha modelu tipu rua mak hanesan, ida ho medida metru kuadradu 37, no ida seluk medida metru kuadradu 48.

Medida metru kuadradu 37 konstrui ho orsamentu $15.000, iha sala vizita no refetóriu ho medida metru 3x4, kuartu 2 ne’ebé kada kuartu ho medida metru 3x3, hariis-fatin ho medida metru 2x3 no dapur ho medida metru 5x3 ne’ebé lokalizadu iha li’ur ka iha uma kotuk.

Enkuantu ba uma ho medida metru kuadradu 48, konstrui ho orsamentu $17.000, iha sala vizita no refetóriu ho medida metru 3x4, kuartu 3 ne’ebé kada kuartu ho medida metru 3x3, hariis-fatin ho medida metru 2x3 no dapur ho medida metru 5x3 ne’ebé lokalizadu iha li’ur ka uma kotuk.

Governu mós planeia atu realiza projetu Uma Kbiit-Laek ba faze daruak iha tinan 2022, 2023 to’o 2025.