Dili, 16 Dezembru 2020 – Elsa Amaral Guterres nu’udar inan faluk ida ho idade 67, haktuir katak militár Indonézia oho hotu nia família sira iha akontesimentu Masakre Krarás iha 1983 iha Vikeke.
Elsa mai hela iha Dili dezde 1980, no oras ne’e nia buka osan liuhosi fa’an fore-rai iha loro-manas laran durante loron tomak, maibé nia dehan dala-barak fore-rai ne’e la folin ka ema la sosa.
“Ha’u fa’an (fore-rai) besik fulan tolu ka haat ona. Ha’u la’o loro-loron la’o dook hodi fa’an maibé ema la sosa ida. Sé sosa di’ak entaun ha’u hetan $10,00, maibé se la di’ak entaun laiha liu. [...]. Ha’u fa’an sasán hosi 2004, primeiru ho modo-tahan [...]. Ha’u la ba ona Vikeke tanba família sira iha ne’ebá ema oho hotu momentu terjadi iha Krarás iha 1983 ne’e”, Elsa haktuir ba Jornalista Timor News, ohin (16/12), iha área besik edifísiu Sentrál Universidade Nasionál Timor Lorosa’e, Dili.
Inan faluk Elsa dehan tán, oras ne'e nia hela iha Taibesi ho de’it nia oan sira, tanba nia katuas oan mós mate tiha ona iha 1990 molok militár Indonézia oho Sebastião Gomes iha igreja Motael iha 1991. Nia oan sira buka osan liuhosi suku sapatu no dalaruma ema bolu ba ke’e valeta.
Elsa husu ba Governu atu tetu to’ok nia kondisaun tanba nia família sira mate hotu iha Vikeke no nia la fila ona ba munisípiu refere.
“Hato’o ba Governu ne’e mak ha’u atu fila fali ba Vikeke mós família sira mate hotu ona [...] Governu bele buka fatin para ami hela”, dehan nia.
Fonte: Timor News