Dili, 13 Janeiru 2022 - Reprezentante inan-aman hosi mellor graduandu Universidade Nasionál Timor Lorosa’e (UNTL) períodu XXV, iha tersa (11/01) ne’e, faluk Viana Ximenes sente orgullu ho oan Clarinha David Lopes nia esforsu hodi hetan mellor klasifikasaun iha UNTL.

“Mensajen ne’ebé ha'u-nia kaben husik hela ba oan sira katak, maski aman ha'u kbiit la to’o maibé ha’u esforsu atu oan imi bele eskola, maibé imi tenke esforsu nune’e bele susesu, tanba ne’e ha'u kontente tebes ba ha’u nia oan Clarinha David Lopes ne’ebé hetan valór boot,”  dehan inan faluk Viana Ximenes iha resintu Sentru Konvensaun Dili (sigla portugés CCD) hafoin partisipa graduasaun.

Graduada Clarinha David Lopes hosi Fakuldade Edukasaun, Arte no Umanidade, reprezenta mellór graduadu sira seluk  hateten katak, durante prosesu estudu nia sempre lembra mensajen hosi nia aman matebian ne’ebé analfabetu, maibé hakarak oan sira tenke eskola to’o nivel universidade.

“Iha momentu ne’e ho orgullu remata ona estudu ho valór 3.39, ha’u hanoin fali apá matebian nia liafuan katak, ha’u mak la hatene lee no hakerek maibé ha’u hakarak imi tenke eskola to’o universidade, maibé imi hakarak kontinua tan, esforsu ba hodi kontinua tanba ha'u-nia kbiit to’o iha ne’e de’it ona, nu’udar oan ha’u hakarak esforsu nafatin hodi kontinua ba oin,” dehan Clarinha.

Enkuantu graduasaun UNTL períodu XXV iha sesaun loraik nian, Clarinha David Lopes sai hanesan mellor klasifikasaun husi Fakuldade Edukasaun, Arte no Humanidade, estudante na’in tolu seluk ne’ebé hetan mós mellor klasifikasaun husi Fakuldade Siénsia Sosiál, Fransisco Xavier da Conceição Pereira Paiva, Fakuldade Direitu Ana Imeliança de Jesus Hula Muda, no Afonso Belo hosi Fakuldade Filozofia no Siénsia Umana.