INAN SIRA SEI SIMU $15 TO’O $20 KADA FULAN HOSI ISIN-RUA TO’O BEBE TINAN NEEN
Dili, 07 Juñu 2022 - Ministra Solidariedade Sosiál no Inkluzaun (MSSI), Armanda Berta dos Santos, ho Ministra Saúde, Odete Maria Freitas Belo, asina akordu diploma ministeriál konjunta ba programa Bolsa da Mãe Jerasaun Foun, ne'ebé realiza iha Edifisiu MSSI Kaikoli, Díli.
Armanda Berta hateten katak programa ne’e ho objetivu atu bele redús problema mánutrisaun iha Timor-Leste no sei implementa uluk iha munisípiu tolu, mak hanesan Ainaru, Bobonaru no RAEOA. Programa ne’e ninia implementasaun sei halo abertura iha 17 Juñu 2022 no sei hahú kedas ho rejistu, hafoin sei halo pagamentu ba benefisiáriu inan sira.
"Inan isin rua kada fulan sei hetan $15 durante fulan 9 nia laran, no bainhira bebe moris ona, hahú hosi seidauk tinan ida (tinan 0) to'o tinan 6, kada fulan sei hetan $20, no bebe moris ho kondisaun normal sei simu $20, maibé sekarik moris ho kondisaun la normal (defisiente) sei simu $30 kada fulan," Armanda Berta esplika.
Programa ida ne'e wainhira implementa iha munisípiu tolu susesu ona mak sei kontinua implementa mo's iha munisípiu seluk. Orsamentu ba projetu Bolsa da Mãe Jerasaun Foun hetan apoiu hosi Governu Austrália.
Fonte: Mídia Ministério da Solidariedade Social e Inclusão (MSSI)
