Dili, 02 Outubru 2023 - Ministru Negósiu Estranjeiru no Kooperasaun (MNEK), Bendito dos Santos Freitas, iha Segunda (02/10) ne’e hala'o enkontru bilaterál ho Ministru Estadu ba Relasaun Esterna Repúblika ĺndia, Rajkumar Rajian Sign, hodi ko’alia kona-ba kompromisu hosi Índia nian ne’ebé mak hakarak atu oferese bolsu estudu ba Timoroan sira, kooperasaun iha setór saúde nian liuliu iha indústria farmaséutika (aimoruk), formasaun ba diplomata Timoroan, no seluk tan.

"Índia kompromete atu apoiu nafatin ita liuliu kona-ba bolsa estudu, kooperasaun iha área saúde, iha área formasaun ba diplomata. Posibilidade iha futuru sira bele apoiu Timor-Leste iha indústria farmaseútika, hodi bele fó aimoruk ne'ebé mak di'ak, ita hatene katak aimoruk barak iha mundu sira-ne'ebé di'ak ne'e prodús iha Índia", dehan Bendito.

MNEK Bendito hateten tan katak, Vizita Ministru Rajkumar Ranjian Sign nian ne’e importante tebes, tanba Primeiru Ministru Índia, Narendra Modi, bainhira hasoru malu ho Primeiru Ministru, Kay Rala Xanana Gusmão, iha Jakarta Indonézia foin lalais ne’e, parte rua konkorda malu tiha ona atu harii embaixada Índia iha Timor-Leste no Timor-Leste iha Índia, nune’e bele reforsa liután kooperasaun bilaterál entre nasaun rua iha futuru.