India, 30 Abril 2021 – Onda daruak propagasaun Covid-19 iha India ho númeru kazu ne’ebé sa’e maka’as liu iha loron hitu ikus ne’e kompara ho kazu sira iha nasaun seluk, no okupa iha pozisaun daruak rejistadu iha wordometers.info.
CNN haktuir, to’o oras ne’e India kontinua halo kremasaun (tuir sira-nia fiar relijioza) ka sunu mate-isin Covid-19 atus resin kada loron. Pasiente sira mate wainhira hein atu hetan fatin toba ruma iha ospitál, enkuantu estoke oxijéniu mós kontinua menus no médiku sira iha presaun nia okos.
Loron hirak ikus ne’e prosesu kremasaun ka sunu mate-isin Covid-19 halo durante oras 24 nia laran. Traballadór kremasaun hateten sira laiha liu tempu atu deskansa uitoan tanba mate-isin kontinua mai.
Iha kapitál New Delhi, ema sunu mate-isin Covid-19 liu 600 kada loron durante iha semana ikus ne’e.
“Sim, kazu mate tanba Covid-19 ne’ebé sira relata kuaze ema 300 kada loron maibé ami sertamente sei sunu mate-isin 600 resin kada loron. Sira la relata númeru kazu mate ho loloos hodi subar tiha balu,” dehan autoridade lokál North Delhi Municipal Corporation (NDMC) Jai Prakash.
India to’o oras ne’e rejista kazu infektadu Covid-19 hamutuk 18.754.925 no kazu mate tanba Covid-19 hamutuk 208,313 tuir dadus atualizadu (29/4) iha wordometers.info. India okupa iha pozisaun daruak nu’udar nasaun ho kazu infektadu Covid-19 barak liu iha mundu.
Fonte: CNN International