Indonézia, 10 Maiu 2023 - primeiru-ministru Taur Matan Ruak, hafoin to’o iha Labuan Bajo, Timor Osidentál, Indonézia, iha ámbitu simeira ASEAN ba dala-42, hala’o kedas enkontru bilateral ho prezidente repúblika Indonézia, Joko Widodo, iha Otel Meruorah, hodi aprofunda liutan relasaun no kooperasaun entre Timor-Leste no Indonézia.

Iha reuniaun refere, prezidente Jokowi hanesan uma na’in prezidensia ASEAN nian, fó benvindu ba primeiru-ministru Timor-Leste, ne'ebé nu’udar membru ASEAN ba dala-11 ho estatutu observadór. Prezidente Jokowi hatutan katak Indonézia hanesan prezidénsia ASEAN, iha komitmentu atu apoiu Timor-Leste nia roteiru, liuliu iha kapasitasaun institusional hodi prepara rekursu umanus Timor-Leste nian hodi bele hakat ba sai nu'udar membru plenu.

Prezidente Indonézia kompromete atu aprofunda liután kooperasaun bilateral, liuliu dezenvolvimentu integradu iha zona fronteira ho Timor Osidentál. Indonézia mós preparadu ba esbosu akordu bilateral investimentu nian hodi dudu ekonomia Timor-Leste ba oin hanesan nasaun membru ASEAN nian.

Nune'e, Xefe Governu Timor-Leste agradese ba konvite espesiál hosi Prezidente Jokowi hodi partisipa iha simiera ASEAN nian no ba apoiu inkondisional Indonézia nian hahú kedas hosi 2021 relasiona ho Timor-Leste nia adezaun ba ASEAN no kompromisu ba apoiu kapasitasaun institusional ne'ebé hato'o hosi prezidente Indonézia.