Túrkia, 13 Agostu 2021 – Akontese udan boot iha norueste Túrkia no hamosu inundasaun boot iha kinta ( 12/8) ne’e hodi hamate ema na’in-17, haktuir CNN nia divulgasaun ohin (13/08).
Inundasaun ne’e harahun área florestál éktare rihun ba rihun, no estraga mós infraestrutura sira hanesan estrada, ponte, enerjia eletrisidade, no seluk tán.
“Vítima sira ne’e na’in-15 mate iha provínsia Kastamonu no na’in-2 mate iha Sinop, daudauk ne’e autoridade sira nafatin buka no halo operasaun,” CNN informa.
Populasaun liu 1.400 mak evakua ona hosi área sira ne’ebé afetadu no balu hetan tulun ho elikópteru no ró sira, no ema besik na’in-740 mak daudauk ne’e refujia hela iha dormitóriu estudante sira nian.
Prezidente Túrkia Tayyip Erdogan hateten, ida ne’e nu’udar dezastre naturál ne’ebé aat liu iha istória Túrkia nian.
Molok inundasaun akontese, iha semana rua ikus ne’e Túrkia oan sira no turista rihun ba rihun mak evakua tiha ona tanba akontese uluk inséndiu florestál ne’ebé da’et maka’as iha rejiaun tasi kosteira Egeu no Mediteráneu.
Fonte: CNN International