IOM OFERESE MÁKINA BA MI HODI VERIFIKA DOKUMENTU FALSU IHA SERVISU MIGRASAUN
Dili, 25 Outubru 2021 – Organizasaun Internasionál ba Migrasaun (sigla inglés, IOM) iha Timor-Leste, iha segunda (25/10) ne’e, iha otél Novo Turismo, Dili, entrega apoiu mákina ‘Verifier Travel Document and Bearer (TD&B)’ ba Ministériu Interiór (MI) atu uza hodi verifika dokumentu falsu no fraude sira iha servisu fronteiriza no migratóriu ninian.
“Previléjiu tebes, lori Ministru Interiór no Primeiru Ministru nia naran hato’o bein-vindu agradesementu ba ita hotu ohin mai iha ne’e. […] Ho ita hotu nia esforsu hamutuk hodi mellora no moderniza Servisu Migrasaun, liuhosi kooperasaun trilaterál entre IOM, Governu Austrália no Timor-Leste espesialmente ba Servisu Migrasaun nu’udar benefisiáriu prinsipál ba eventu ida ohin,” dehan Vise Ministru Interiór Antonio Armindo, hafoin simu direita tiha mákina refere hosi parte IOM.
Xefe Misaun IOM iha Timor-Leste, Ihma Shareef, hateten katak instalasaun mákina Verifier TD&B ne’e atu hatán di’ak liután ba dezafiu sira liuliu fraude dokumentu viajen no identidade, bazeia ba análize trends rejionál no nasionál, atu dezenvolve resposta jestaun fronteira operasionál bazeia ba intelijénsia.
Ihma esplika, makina Verifier TD&B ne’e mós sei halo inspesaun automátika nune’e bele ajuda Interpol no ofisiál migrasaun sira-nia servisu iha pontu entrada, hodi halo ezaminasaun ba dokumentu no verifikasaun identidade ne’ebé grava iha sistema.
Fonte: Mídia Serviço Relações Públicas de Ministério do Interior
