Manufahi, 10 Novembru 2021 – Institutu Politékniku Betanu (IPB) realiza serimónia graduasaun ba daruak ba estudante hamutuk na’in-83, ohin (10/11) iha Betanu, Same, Manufahi.
Prezidente IPB hateten, totál graduadu na’in-83 ne’ebé hetan graduasaun daruak iha IPB tinan ida ne’e kompostu hosi feto na’in-29 no mane na’in-54. Hosi ne’e, ensínu superiór enjeñaria departamentu kontrusaun sivíl graduadu na'in-35 no ensínu superiór agronomia Zeotéknika produsaun animál graduadu na'in-48.
Iha fatin hanesan, Diretora Jerál Ensinu Superiór Siénsia, Maria Filomena Lay Guterres, reprezenta Ministru Ensinu Superiór, Siénsia no Kultura, hateten, nia agradese ba IPB tanba konsege prodúz no gradua rekursu umanu ne'ebé ho kualifikadu, tanba rekursu umanu sai fatór determinante hodi dezenvolve sosiedade no nasaun Timor-Leste.
Graduadu Isaac Agostinho da Cruz agradese ba IPB, inan-aman no familia nia apoiu tomak ne’ebé lori sira konsege finaliza estudu.
Fonte: Diáriu "Roman ba Sosiedade" Manufahi