Dili, 12 Jullu 2021 – Inglatera la konsege atinje nia ambisaun atu sai nu’udar kampeaun Euro 2020 tanba lakon ho score 2-3 kontra Itália liuhosi drama sutu penalidade iha jogu finál ne’ebé hala’o ohin (12/7) madrugada iha Wembley Stadium, Londres.
Inglatera alias The Three Lions lidera uluk iha jogu tempu normál parte minutu 45’ dahuluk liuhosi golu ne’ebé jogadór Luke Shaw marka sedu loos iha minutu 2’. Maibé tama iha jogu tempu parte daruak nian Itália responde hikas liuhosi nia jogadór Leonardo Bonucci ne’ebé marka iha minute 67’. Score balansu 1-1 iha tempu normal to’o hakat ba drama sutu penalidade ho rezultadu Inglatera 2-3 Itália.
Nune’e Itália sai ona kampeaun Euro ba dala-2 (1968, 2020), enkuantu Inglatera seidauk hetan. Nasaun ne’ebé oras ne’e sai kampeaun Euro barak liu mak Alemaña dala-3 (1972, 1980, 1996) no España dala-3 (1964, 2008, 2012).
Fonte: BBC News