Dili, 21 Outubru 2021 – Jefri Borges Ximenes ho idade tinan 12, hamutuk ho nia alin, loro-loron sira na’in-2 leba manu-tolun da’an hodi ba fa’an iha estrada públiku hafoin fila hosi eskola. Nia husu ba labarik seluk atu aprende ajuda inan-aman no labele halimar demais.
Wainhira dada-lia ho jornalista Timor News, ohin (21/10) iha Fatuhada, Dili, Jefri dehan katak nia ho nia alin mak hakarak fa’an hodi buka osan atu sosa nesesidade eskola nian.
“Ha’u mak hakarak fa’an para osan iha hola farda sira, hola buat ida ita presiza ne’e. […] eskola tama tuku 08:00 no sai tuku 10:00. Fila mai fa’an manu-tolun. […] Ama-apa sira mak da’an mak ami fa’an,” Jefri dehan.
Jefri oras ne’e hala’o hela estudu iha eskola ida iha Ai-Mutin, Dili, no klase 6. Sira maun-alin hamutuk na’in-3 no nia mak oan ba dahuluk.
“Labarik sira tenke ajuda inan-aman,” nia dehan.
Fonte: Timor News