Europa, 06 Agostu 2021 – Barcelona anunsia ona katak jogadór ho nasionalidade Arjentina Lionel Messi ofisialmente sai ona hosi klubu futeból Barcelona ho razaun falla iha akordu kontratu foun tanba Barcelona hasoru hela problema finanseira, haktuir Sky Sport ohin (06/8).
“Maske klubu futeból Barcelona ho Lionel Messi atinje ona akordu no iha intensaun klaru hosi parte rua atu asina kontratu foun ohin, maibé ida ne’e la akontese tanba problema finanseira no estruturál (regulamentu Liga Española),” parte hosi klubu Barcelona deklara iha divulgasaun ofisiál ohin.
Enkuantu jogadór avansadu ne’e nia kontratu ho klubu Barcelona remata iha 30 Juñu 2021.
“Barcelona ho fuan hato’o obrigadu ba jogadór ne’e ba nia kontribuisaun, no dezeja buat hotu di’ak liután ba nia futuru profisionalizmu,” klubu akresenta.
Messi halo ona aparénsia ba Barcelona hamutuk dala-778 no prodúz golu hamutuk 672 ne’ebé ajuda asegura títulu liga 10, Champions Leagues 4 no troféu seluk tán dezde joga hamutuk ho Barcelona seniór.
Fonte: Sky Sport