Europa, 13 Juñu 2021 – Selesaun Portugál obrigatoriamente hasai nia jogadór João Cancelo hosi lista squad ba EURO 2020 tanba defeza ho idade tinan 27 ne’e pozitivu ba Covid-19.
Haktuir sítiu ofisiál Portugál nian, Cancelo konfirmadu pozitivu infetadu Covid-19 hafoin realiza teste PCR iha sábadu (12/6) ne’e no rezultadu sai iha domingu (13/6).
“Tuir protokolu Covid-19 ne’ebé UEFA mantéin molok jogu EURO 2020 hahú, jogadór hotu-hotu no membru ekipa sira sei halo teste RT-PCR, no rezultadu hatudu katak jogadór Portugál Cancelo pozitivu no sira seluk negativu,” haktuir Bola Net.
Nune’e, Portugál bolu hikas jogadór Diogo Dalot hodi troka João Cancelo. Iha jogu entre klubu, Cancelo nu’udar defeza Manchester City nian ne’ebé sai manán-na’in ba Premier League, enkuantu Diogo Dalot iha Manchester United maibé fó empresta hela ba AC Milan.
Fonte: Bola Net