JOVEN MANE IDA HOSI ERMERA NA'OK KARTEIRA IHA LOJA LARAN IHA PARTE AUDIAN
Dili, 08 Agostu 2023 - Ekipa konjunta kompostu hosi Aranha Leste, Oeste, Makikit Dili no Sentru Nasionál Investigasaun (SNI) destakadu PNTL, kaptura suspeitu joven mane ida ho inisiál AMS, tinan 39, hosi Ermera, ne'ebé na'ok karteira joven Feto ida nian iha Loja Y&W Shopping Stores, parte Audian nian. Suspeitu ne'e ekipa konjunta kaptura tiha ona iha Tasi-tolu no rekolla mós ho evidénsia karteira ne’ebé mak nia na'ok.
Hafoin kaptura tiha no lori to'o eskuadra PNTL Na'in Feto, suspeitu deklara katak nia servisu hanesan bada'en halo uma iha munisípiu Ataúro, maibé tanba ema la selu no nia atu halo viajen ba Ermera maibé nia osan laiha hodi selu kareta, entaun nia deside na'ok.
Ho deklarasaun hirak ne'e, vítima (na'in ba karteira) desidi perdua tiha suspeitu no konkorda rezolve tuir família, maibé husu atu nia labele halo tán asaun ida ne'e iha futuru.
Osan ne’ebé iha karteira laran hamutuk dolár 60 no suspeitu gasta ona dolár 20 hodi sosa hahan.
Fonte: Mídia Polícia Nacional de Timor-Leste (PNTL)
