Dili, 14 Outubru 2021 – Juliana Lafu nu’udar feto timoroan ida ne’ebé sente susar tanba durante forma família sira kompleta nesesidade bázika liuhosi peneira rai-henek loro-loron no fa’an.
“Túr iha uma osan laiha, tenke mai baku rai-henek para kareta iha tula, kareta laiha hein de’it, araska loos […] semana ida ema hola ami-nia rai-henek dala rua ka tolu. Rai-henek nomor 2 ne’e $12 no nomor 1 ne’e $18 selae $20. […] Osan ne’e hodi hola foos, mina, labarik sira-nia hena,” Juliana Lafu informa ba jornalista Timor News ohin (14/10) iha mota Komoro, Dili.
Juliana hateten katak nia ho nia la’en no oan na’in tolu loro-loron tau esperansa iha kareta ne’ebé baibain tama ba mota laran hodi sosa rai-henek.
Nia husu ba parte Governu atu tún ba haree komunidade sira ne’ebé moris ho peneira rai-henek nune’e tetu hodi aloka apoiu ruma ne’ebé bele hakmaan sira-nia esforsu.
“Imi konforme iha imi, sé hanoin ami ne’e fó netik buat uitoan foos ka saida de’it para tulun ami,” nia dehan.
Fonte: Timor News