Dili, 20 Setembru 2021 – Governu kria subsídiu mensál ai-hán no transporte ba funsionáriu públiku sira iha Timor-Leste. Nune’e, ba subsídiu mensál ai-hán nian, kada fulan funsionáriu públiku sira sei simu foos kilógrama 35 (35kg) inklui ai-hán seluk tán. Ba transporte nian, kada fulan funsionáriu públiku sei simu osan $25, Xefe Sesaun sira sei hetan $50, Xefe Departamentu sira $75, Diretór Nasionál sira $100, no ba Diretór Jerál sira $150.
Kriasaun subsídiu ai-hán no transporte ba funsionáriu públiku ne’e hetan ona aprovasaun iha reuniaun Konsellu Ministru ne’ebé hala’o ohin (20/9) iha Palásiu Governu, Dili, hafoin aprezenta tiha hosi Ministru Finansa Rui Gomes.
“Subsídiu ida ne’e, hanesan produtu agríkola nasionál ne’ebé sei fó ba funsionáriu públiku sira ho objetivu permite hamenus despeza ho akizisaun ba ai-hán sira no konfesaun refeisaun sira. […] Fulan-fulan funsionáriu públiku sira iha direitu ba foos 35kg, batar kilógrama lima, koto kilógrama rua, fore-mungu kilógrama lima no fore-keli kilógrama rua. Karik laiha produtu sira anteriór balu ne’ebé temi ona, bele troka ho produtu sira seluk ho valór hanesan. Sei entrega trimestralmente hosi órgaun no servisu sira ba benefisiáriu sira ne’ebé ezerse ninia funsaun,” Governu esplika kona-ba subsídiu mensál ai-hán, iha komunikadu ofisiál ne’ebé Timor News asesu ohin.
Kona-ba subsídiu transporte, Governu esplika, “kriasaun subsídiu ida ne’e atu kompensa kustu regulár sira hosi benefisiáriu sira relasiona ho transporte no mós atu hamenus despeza hosi atribuisaun veíkulu sira Estadu nian no promove rasionalizasaun ba parte automóvel públiku. Montante mensál subsídiu nian ho valór $25 ba funsionáriu públiku sira, $50 ba Xefe sira Sesaun nian, $75 ba Xefe sira Departamentu nian, $100 ba Diretór Nasionál sira no $150 ba Diretór Jerál sira”.
Dekretu-Lei kona-ba subsídiu ai-hán no transporte ne'e sei haruka ba Prezidente Repúblika atu promulga hodi bele implementa hahú iha tinan oin.
Fonte: Mídia Ministério das Obras Públicas (MOP)