Dili, 21 Maiu 2021 – Vise Prezidente Komisaun Rekrutamentu FALINTIL-Forsa Defeza Timor-Leste (F-FDTL) Nuno de Carvalho dos Santos anunsia katak totál númeru final kandidatu F-FDTL ne’ebé pasa iha selesaun dokumentu hodi tuir teste hamutuk ema na’in-2.400.
“Tanba situasaun Covid-19 halo prosesu (rekrutamentu) ne’e tenke adia no ohin ma kami foin bele fó sai ba públiku, ami hakarak deklara katak, lista kandidatu ne’ebé liu iha selesaun dokumentu ba tinan ne’e hamutuk ema 3.139 hosi totál formuláriu 12.259 ne’ebé komisaun rekolla iha inísiu 2020. Maibé, depois komisaun halo re-verifikasaun ba kandidatu 3.139 ne’ebé temi iha leten, konsege hetan númeru final hamutuk kandidatu 2.400,” Nuno deklara iha konferénsia imprensa ne’ebé hala’o ohin (21/5) iha Kuartél Jerál F-FDTL, Fatuhada, Dili.
Nia akresenta katak kandidatu 2.400 ne’e sei hakat fali ba faze ezaminasaun médiku, teste fízika, psiko-téknika, no entrevista. Iha faze hirak ne’e komisaun sei haree hikas kandidatu sira-nia rezultadu ezame no halo tán re-verifikasaun molok fó sai naran finál ba públiku iha fulan Jullu hodi inkorpora ba instituisaun F-FDTL.
Enkuantu lista naran kandidatu sira nian sei taka sai iha kada munisípiu no postu-administrativu sira inklui iha Komandu Polísia Munisipál no Eskuadra sira.
Fonte: Ministério da Defesa Timor-Leste