Dili, 14 Jullu 2021 – Parlamentu Nasionál halo eleisaun ohin (14/7) no hili ona Kandidatu hosi Bankada Partidu Libertasaun Populár (PLP) José Agostinho Belo hodi sai nu’udar Prezidente Komisaun Nasionál ba Eleisaun (sigla portugés CNE) hodi troka hikas Alcino de Araújo Báris.
Iha eleisaun ne’ebé Parlamentu Nasionál halo, Kandidatu José Agostinho Belo hetan votu 35 enkuantu Kandidatu hosi Bankada Frente Revolucionário de Timor-Leste Independente (FRETILIN) Alcino de Araújo Báris ne’ebé rekandidata hikas, hetan votu 29.
Nune’e José Belo eleitu ba Prezidente CNE ba mandatu tinan lima (5) hodi substitui Alcino Báris.
Prezidente Parlamentu Nasionál dejeza susesu ba Prezidente CNE foun durante nia mandate hamutuk ho nia komisáriu foun ne’ebé hili mós ohin.
Fonte: Media Parlamento Nacional