Dili, 27 Setembru 2023 - Reuniaun Konsellu Ministru (KM) ne'ebé hala'o iha Kuarta (27/09) ne'e, aprova tiha ona projetu Dekretu-Lei (DL) ne’ebé aprezenta hosi Ministru Komérsiu no Indústria (MCI, sigla portugés), Nino Pereira, kona-ba medida halo intervensaun temporária ba normaliza presu foos iha merkadu, liuhosi atribui subsídiu pekuniáriu (osan) ba empreza importadór sira. Diploma ne’e determina mós estoke suplementár ida ba seguransa foos ho tonelada rihun 30 hodi rai iha armazein Sentru Lojístiku Nasionál (SLN), ne’ebé destina ba intervensaun sosiál iha situasaun emerjénsia,  liuliu  inundasaun, katástrofe naturál, motivu sanitáriu sira, solidariedade sosiál no atu fornese ba empreza grosista sira (empreza sira ne’ebé fa'an ho kuantidade boot) karik presiza.

Presu foos importasaun ne’ebé fa’an iha armazein hosi empreza importadór sira-nian no fa'an filafali ba konsumidór sira iha loja sira ne’ebé fa'an foos, ho kuantidade uitoan-uitoan ne’ebé ema barak liu maka konsume, normaliza ho valór sentavu 50 kada kilograma. Benefisiáriu hosi medida ida-ne’e mak empreza sira ne’ebé fa’an ho kuantidade boot ka operadór ekonómiku sira ne’ebé komprova, liuhosi kópia autentikada hosi Autoridade Aduaneira, katak sira importa no simu ona kuantidade foos ho karaterístika ne’ebé define tiha ona iha diploma ne’e, simu valór hamutuk dolar lima kada foos ho kilograma 25 ne’ebé importa ka fa’an. Períodu vijénsia hosi medida ida-ne’e maka loron 180, hafoin diploma ne’e tama iha vigór iha loron tuir mai hosi ninia publikasaun.