Dili, 07 Dezembru 2021 – Prezidente Repúblika (PR) Francisco Guterres Lú Olo, iha komemorasaun loron memória 07 Dezembru, apela ba povu hotu-hotu reflete dalan naruk terus nian ne’ebé hala’o tiha ona hodi inspira no fó forsa hodi kontinua obra ne’ebé inisia tiha ona.

“Ha’u apela ba kompatriota hotu-hotu atu aproveita loron memória, ho dalan individualmente ka iha koletivu, reflete dalan naruk terus nian ne’ebé ita liu tiha ona. Nia bele inspira ita no fó forsa atu kontinua obra ne’ebé inísia tiha ona,” temi iha mensajen nian ba komemorasaun loron memória ne'e.

PR salienta tan katak, povu Timor-Leste agradese ba sakrifísiu mártiru sira ne’ebé mate iha funu laran hanesan forma ida hodi rekoñese saida mak sira halo tiha ona ba rai ida ne’e.

“Ita hotu preokupadu atu harii futuru. Atu halo ne’e nesesáriu tebes valoriza pasadu. Ita-nia devér atu hatene sakrifísiu ne’ebé hatudu husi kompatriota sira mate iha funu laran, nu’udar forma ida rekoñese saida mak sira halo tiha ona ba rai ne’e. La ho sira-nia mártiru no sakrifísiu ita la hetan pátria ida livre no independente,” Lú Olo salienta.

Enkuantu Lú Olo husu mós ba família, eskola, partidu Polítiku, organizasaun sosiedade sivíl no sidadaun hotu-hotu esforsu atu koñese ita-nia istória, valoriza ita-nia pasadu, foti lisaun hodi garante futuru ne’ebé di’ak liu ba jerasaun foun sira.