Dili, 24 Juñu 2021 – Komandante Jerál (KomJer) Polísia Nasionál Timor-Leste (PNTL) Komisáriu Polísia Faustino da Costa fó hanoin ba adeptus futeból sira katak ekipa favóritu lakon ka manán presiza rekoñese realidade hodi haree malu ho di’ak nafatin.
KomJer PNTL hato’o ida ne’e ohin (24/6) hafoin hasoru tiha malu ho Prezidente Repúblika iha Palásiu Prezidensiál, Dili, no wainhira nia esplika ba imprensa kona-ba kazu asidente fátal ne’ebé akontese horisehik (23/6) iha Kuluhun no Delta, Dili, relasiona ho kopa Euro 2020 tanba kestaun adeptus futeból sira-nia nasaun favóritu iha kopa refere ida manán no seluk lakon depois la satisfáz.
“Ita bele fans ba nasaun ida ne’e ou ida ne’ebá maibé realidade ita tenke hatene no rekoñese mós, labele dehan lakon ona ita haree maluk seluk la di’ak, ne’e nasaun seluk mak joga bola halo nusá mak ita halo ida ne’e ba ita-nia maluk sira,” dehan Faustino, haktuir informasaun ofisiál divulga hosi parte PNTL.
Fonte: Mídia Polícia Nacional de Timor-Leste (PNTL)