Ainaru, 10 Jullu 2021 – Kompañia distribuidór ai-hán Sesta Bázika husu ba Governu kontinua implementa programa Sesta Bázika iha futuru hodi motiva to’os-na’in sira sai produtivu liután.
“Ami hato’o agradese no obrigadu barak ba programa ne’e, no ami husu nafatin katak programa ne’e labele para, maibé kontinua nafatin iha futuru mai para motiva ita-nia povu agrikultór sira bele ativu liután no produtivu liután,” dehan Diretór Kompañia Maristi Afonso Barreto, ohin (10/7), iha serimónia enseramentu programa Sesta Bázika iha munisípiu Ainaru ne’ebé ensera hosi Sekretáriu Estadu Kooperativa (SEKOOP) Elizário Ferreira.
Afonso Barreto hateten katak programa distribuisaun ai-hán Sesta Bázika motiva ona kompañia no komunidade sira ne’ebé sai nu’udar benefisiáriu.
Iha serimónia enseramentu ne’e, SEKOOP mós hato’o agradesimentu ba kooperasaun ho autoridade lokál no Polísia Ainaru ne’ebé asegura ona programa refere to’o remata, hodi fahe mós sertifikadu rekoñesimentu.
Iha munisípiu Ainaru membru família ne’ebé mak sai nu’udar benefisiáriu ka simu ona ai-hán Sesta Bázika ho totál 86.569.
Fonte: Secretaria de Estado de Cooperativas (SECOOP)