Manufahi, 25 Abril 2022 – Komunidade iha suku Klakok, postu-administrativu Fatuberliu, iha domingu (24/4) ne’e, fura bee no hetan fali mina no gás lakan hosi rai okos iha área Webikas.

Administradór munisípiu Manufahi, Arantes Isaac Sarmento, ohin (25/4), informa katak, Administradór postu-administrativu Fatuberliu informa ona deskobrimentu ida ne’e ba nia, no pasa ona informasaun ba Ministru Administrasaun Estatál hodi hato’o direita fali ba Ministru Petróleu no Minerál atu bele haruka ekipa Jeolojia ba fatin refere hodi justifika loloos.

Arantes esplika, parte polísia mós hapara kedas atividade fura bee ne’e no tau seguransa iha fatin refere hodi entrega ba Estadu at uhalo estudu ba gás no mina ne’ebé mosu hosi rai okos ne’e.

Administradór munisipál ne’e hateten katak, fatin ne’ebé gás no mina mosu ne’e la tama iha área survey ne’ebé ekipa tékniku hosi Timor Resource halo iha tinan hirak ba kotuk. Ekipa hosi Timor Resource halo de’it survey iha postu-administrativu Alas no Same.