Dili, 13 Agostu 2021 – Komunidade iha suku Uma-Kaduak, munisípiu Manatutu, husu ba Governu atu aselera prosesu konstrusaun moru hodi hale’u fatin turizmu One Dollar Beach ne’e atu komunidade sira bele hahú hikas negósiu.
Xefe suku Uma-Kaduak Fermino Ribeiro da Cruz hateten, konstrusaun moru ne’e halo komunidade sira-nia atividade negósiu iha One Dollar Beach paradu kleur ona, nune’e, sira la hetan rendimentu ruma loro-loron hodi hatán ba nesesidade.
“Moru ne’ebé hale’u One Dollar Beach ne’e estudante Dom Bosco nian mak halo. To’o agora komunidade sira seidauk hela iha ne’ebá tanba konstrusaun seidauk hotu. […] Komunidade sira preokupa tanba durante halo konstrusaun iha ne’ebá sira la halo negósiu, uluk ne’e sira hetan rendimentu hosi fatin ne’ebá (One Dollar Beach), maibé tanba halo tiha konstrusaun iha ne’ebá entaun sira mós la hetan rendimentu hosi fatin ne’ebá. […] Nu’udar Xefe suku, ha’u rekomenda ba Governu atu aselera lalais konstrusaun moru ne’e para komunidade sira bele halo fali negósiu no depois para bele atrai ona turista sira,” dehan Xefe suku ba Timor News, ohin (13/8) via telefone.
Nia akresenta, komunidade sira iha suku Uma-Kaduak mós husu ba Governu katak wainhira konstrusaun iha One Dollar Beach remata, sira mak tenke sai na’in ba fatin turizmu ne’e hodi halo negósiu.
“Uluk komuniadade sira hato’o ona pedidu ne’e ba iha Eiz Sekretáriu Estadu Formasaun Profisionál no Empregu señor Ilidio Ximenes uluk sei asume hela kargu ne’e, katak wainhira halo konstrusaun ba fatin turizmu ne’e hotu komunidade negosiante sira aban-bainrua sira mak sei sai na’in ba iha fatin ne’ebá,” Xefe suku salienta.
Fonte: Timor News